Tusi a Faipule HRPP ia fa’amalolo le Minisita o Tupe

Tuilaepa Sailele Malielegaoi

Tuilaepa Sailele Malielegaoi

3 Me 2013

Hon. Tuilaepa Sailele Malielegaoi
Afioga i le Ta’ita’i,
Vaega Faaupufai a le HRPP
APIA.

Afioga e,

Mataupu: Faumuina Tiatia Liuga

Lau Afioga i le Alii Palemia, o le autu ma le agaga moni o lenei tusi o le faaalia lea o le alofa moni mo lau Afioga o le Taitai o lo tatou vaega faaupufai o le faafaletui a le HRPP.

Ua matou lagona ua tatau ona faaleo atu ma le agaga faanoanoa tele ona o ni mataupu ogaoga o loo aafia tele ai le afioga ia Faumuina Tiatia Liuga. Ua le toe po se lilo i lau silasila ma lau taga’i, lau faalogologo ma lau maitau i ni mataupu tūgā ma le matagā ma ua faasolo ai ina aveese le faatuatuaga ma le tauleleia o le tatou faigamalo i le silasila a Samoa atoa.

Ua matuā manino ma le atoatoa faiga faaiuga soonafai, lē alofa ma le lē taupulea ua atagia ai le vaavaa o le tofā ma le faautautaga ua fesiligia ai ma le amiotonu o faiga faaiuga a le Kapeneta. A o le itu sili ona lē manuia o le aafia ai o le tamaoaiga o si o tatou atunuu.

I le maitau i futia ua sola ma aso ua alu, e le i faigofie le asaina o manū ma lelei aemaise le saili mālō o ni o tatou tuaa ma matuā na amataina mai le vaega faaupufai seia oo mai i lou taimi Tuilaepa. O loo o matou olo pea le fua ma avatu le lagolago atoa, ma le fatu atoa ona o le alofa moni i le tatou vaega faaupufai faapea Samoa o loo tuuina mai la latou faatuatuaga i lau Afioga ma tatou uma.

E leai se agaga e sailiili masei, pe saili masae, pe faamasino atu. Peitai ua matuā manunu le to’au pe a silasila i le 15 tausaga talu ona ave le faaeaea a le tatou vaega faaupufai ia Faumuina e avea ma Minisita o le Kapeneta. O le mea moni, ua matuā mautinoa ua sili atu mea faaletonu nai loo mea lelei sa faatinoina.

E faamalulu atu i lau Afioga ae e talitonu lava le taofi, e le tatau ona oti i tua se manatu ma se finagalo leaga o tatou uma o sui filifilia na filifilia mai e le atunuu e omai e fau le Malo ma lagolago atu i lau taitaiga. Ae ua matuā lagona le matamuli ona ua tuufesili le atunuu poo fea o i ai isi sui o le HRPP ae o loo tatūtū vae lenei tagata i finagalo ma soonafai ma le faatautala  aemaise le manatu faapito i mea totino a le atunuu.

Ua matuā soo le lalolagi atoa i tusitusiga o faaiuga lē faautauta lelei a lenei Minisita ma ua matua atagia ai le ta’u faatauvaaina o le Kapeneta aemaise le igoa tauleleia ma le faatuatuaga a Samoa o loo tuuina mai. Ua foliga mai ua tatou lē manatu mamafa i le faatuatuaga na aumai e Samoa, le faaaloalo lea e umi ai pea ona tatou tu i le foe o le tautaiga o le Malo.

Matou te talitonu e le o po malaē i lau Afioga i le Alii Palemia. E le o lilo foi i le ‘au maitau a le atunuu, a e lailoa Tuilaepa e punipuni matagi i faaletonu ma matagā o faiga faaiuga sese a lenei Minisita.

O nisi nei o vaega ua na ona matou faamaalo iu ofe ma faamanatu atu.  Ae matou te talitonu o loo silafia lelei e lau Afioga a le taitai e tele ma anoanoai, ae na ona matou  avatu ni vaega e fua i ai se faautautaga tatau ma se faaiuga ua tatau ona fai.

  1. Tupe fa’aaoga fa’aletatau mo le fausiaina o lona ofisa a o avea o ia ma Minisita o Galuega, fa’apea foi le ofisa ao avea o ia ma Minisita o Siosiomaga, ae le fa’aaogaina le Maota ua fa’aiugafonoina e le Kapeneta e aofia uma i ai Minisita, i le Maota o Mata’afa Fiame Mulinu’u.
  2. E pule lava ia e alu ma ave lana ta’avale tusa pe ua maea lona taimi i lea matagaluega, ua atagia ai foi lona manatu fa’apito e filifili e ia le mea e lelei ma aoga lava mo ia.
  3. Fa’aletonu le uafu fa’avaomalo i Salelologa e o’o mai i le aso e le o fa’aogaina.
  4. Fa’aletonu pea le maketi fou i Salelologa e o’o mai i le aso ua le gafatia e tagata ona totogi lisi ona o lo’o ta’ape solo auaunaga tau faletupe ma isi ua le foliga ai i se taulaga.
  5. Fa’aletonu pea le maketi fou i Vaitele.
  6. Ta’avale taugata o lo’o feoai ai lona aiga, Lexus.
  7. Unnecessary extra variation, toe totogi i le power station i Fiaga.
  8. Ua maitauina ua na o tagata lava o lona itumalo o lo’o to’atele i fanua i Falelauniu.
  9. Unnecessary extra variation, fausiaina lē fuafua lelei o le nofoaga tutotonu a le SLC i Tuana’imato.
  10. Fa’atauina o se loli eli vai (water drill) ae ua le toe fa’aaogaina, ua matua maimau ai le tele o tupe.
  11. Malaga na alu ai le latalata i le $1 miliona, le road show a lana Matagaluega ae leai se uiga ma leai se mea na maua mai ai.
  12. O le ata o le fale o le SIFA ua uma ona totogi ae e le i faia se galuega.
  13. Force le fausiaina o le falemai i Vaipouli (no tender).
  14. O le fa’aaogaina o le $600,000 e fa’atino ai lona ofisa fou i le NPF Plaza. Lau Afioga, sa e tauaveina foi le tofi Minisita o Tupe, sa lava a ma totoe le Ofisa i luga o le Central Bank, ae peita’i o se fuafuaga ua sili ona valea ma le lē fa’avaea lenei manao ua faia e Faumuina Liuga, ua ia fa’aaogaina ai lenei tupe tele sa tatau ona fa’aaogaina mo nisi atina’e talafeagai aua se manuia o le atunu’u atoa.
  15. O le faia’ina matagā o le Malo i le fa’amasinoga ma le kamupani a le Siva Afi lea ua maimau ai le $1.7 miliona. O lena e manino lelei lau afioga, o nei fa’aletonu uma ona o le lē finaua’ia o Faumuina Liuga, ua atagia ai le fa’atamala e le gata o le Malo, ae o le tatou vaega fa’aupufai.
  16. O le fa’aletonu o fuafuaga uma o le Maketi i Fugalei mai lava i le amataga seia o’o mai i le asō, e aofia ai ma le maimau o le $1.8 miliona tala a le atunu’u, e mafua mai i fautuaga uma ma le mana’o o Faumuina Liuga. O ana saunoaga i le TV e uiga lava i lenei mataupu, e alia’i mai ai le fa’asausuli ma le toe’e o lenei tagata, e ala i upu ma tala so’ona lafo ao o lo’o fa’afofoga mai le mamalu o le atunu’u.
  17. A e maitauina ma le totoa tusitusiga a nusipepa, aemaise lava le Samoa Observer, e le o agai tele se fa’amatalaga ia Faumuina Liuga ma ona fa’aletonu ae o lo’o aga’i mai i le fa’aleagaina lea o le vaega fa’aupufai a le HRPP. E pei o tusitusiga i le vaiaso ua tuana’i atu, o lo’o taumafai le pepa e lagalaga mai mea ua na tutupu i le taimi o Luagalau, Leafa ma Toi ae le o a’afia mai lava Faumuina Liuga. E talitonu le taofi o lo’o e silafia le so’otaga lea e mafua ai le foliga mai o lo’o puipui e le Observer le Minisita ae ua le faia le mea amiotonu, o le matuai molita’i mai a’afiaga o le Minisita o Tupe i ana amioga le talafeagai o loo a’afia ai le tamaoaiga o le atunu’u.
  18. Tuilaepa, a manatu i lau fa’aiuga fa’amaoni na fai ia Toi ma Leafa na i’u lava ina fai le fa’aiuga fa’amaoni a le Fa’amasinoga. O le moni lena o lou alofa mo le fa’afaletui. Palasi pea le samala i le ulu o le fao ma fa’asala pea i latou ua fa’aletonu, a ia tumau pea le tauleleia o le HRPP.

Lau Afioga, e anoanoa’i le tele o mau matou te fia tu’uina atu e fa’amausali ai lo matou talitonuga ua silafia e le Atua ua telē le faaletonu. Ae matou te lagona ma le agaga fa’aaloalo o lo’o e silafia mea uma.

Ua matou valuvalusia a’a o le fau ma fautua atu ia te oe le ta’ita’i, ona matou te ava i lau tofiga i le Kapeneta ae o le matou manatu moni ua lē toe talafeagai ma toe agava’a lenei tagata i le tofiga o le Minisita o Tupe.

Tuilaepa, afai e iai ni ou alofaaga mo le tatou vaega faaupufai faapea le faatuatuaga a Samoa o loo tuuina mai ia i tatou, finagalo malie fai sa tatou faatatau i se faaiuga talafeagai ia Faumuina Liuga,

FAAMALOLO PE FAAMAVAE.

Afai ua iai se upu ua le tau-tamalii i lau faafogafoga mai, lafo i nuu le ainā, ae ona o le naunautaiga lava ia maua le maopoopoga o le tatou vaega faaupufai, aemaise o se manuia o le atunuu, ua ala ai ona matou le alo lava i se ataata o se laau, ae ua tuuina atu pea i lumā mea se manatu vaivai e faufau ai lo tatou sa.

Faia ma le faaaloalo tel

FAIPULE O LE TATOU FAAFALETUI HRPP
VAEGA E PUIPUIA AIA TATAU A TAGATA

Share

3 Comments

  1. europa mataia

    I can see jealousy behind the scene. I have read the letter and can smell rats in the kitchen. Remember folks, there’s always two side of the story. Looks like some of them are ganging up against one member and have brought faults to nail one of their colleague. I can see only the name of the Hon. Chief Faumuina (the accused) and the Hon. Prime Minister (their leader) but what about the names of those who wrote the letter. No one seems to be willing to put their names on the line to prove how valid their claims are.

    Issues relating to the party are personal matters and up to the party’s fair trial behind closed doors or during their own business meeting. That is normal proceedings according to Westminister system that our Samoa parliament have followed throughout the ages – from the first Hon. Prime Minister Paramount High Chief Mata’afa Fiame Faumuina I to today with Hon. Prime Minister Chief Tuila’epa Malielegaoi. There is also a warning to the member in question if found guilty for a fair go. Even if he is found guilty (presumably not) it is not proper for the leader to punish the member severely. He should have been warned within their party’s a long time ago before he can be sacked or asked to step down.

    May God continue to bless our politician throughout their time in office. May they continue to have a good heart for the people and be honest in their duties.

    So help them God.