Maligi loimata tina matutua Mamona

LDS AigaSamoa i Brisbane.

LDS AigaSamoa i Brisbane.

LOGAN CITY, BRISBANE, 24 SEPTEMBER 2013.

Toai taunuu mai ma le manuia le faigamalaga a sui o le AigaSamoa LoganCity i le aso Toonai na tea nei 22 Setema 2013 e pei ona tuua ai Brisbane i le aso 15 o Setema ona o se feiloaiga ma le afioga i le alii Palemia o Samoa afioga ia Tuilaepa Sailele Malielegaoi.

O le aso Sa na sosoo ai na faia se toonai tuu faatasi aua le faafeiloaiina o le faiga malaga ma sei faafofoga le mamalu o le AigaSamoa LoganCity i se lipoti a le au malaga e pei ona fono ai ma le alii Palemia i le aso 16 o Setema 2013.

Sa leai se mea e gase pe pao ao tolaulauina e le Peresiteine o le AigaSamoa LoganCity le latou lipoti le susuga ia Mataafa Tareta Hakula Siakisini faapea le aumalaga o le latou lipoti, na iai foi le loimata maligi i tina matutua o le mafutaga e pei o le ata sa pueina ona o le faafiafia ina e tusa o le tali sapaia e lana afioga i le alii Palemia o le mataupu o lo o finauina mo le toe faafoi ina mai lea o Uarota Samoa e tapuai ai le gagana Samoa moni e malamalama lelei ai i aoaoga o le Talalelei, e pei ona tapunia faatauasoina ai e Taitai faalesiteika tagata i se konefesi sa faia i Woodridge Logan City i le aso 16 Setema 2007, o lea konefesi sa taape tagata Samoa ma le maligi o loimata ona o le auala sa faasiilima ina ai faatauaso e nei taitai tagata mo le lagolagoina o eria fou faapea taitai faalesiteiki fou i Logan City ma Brisbane atoa, ae mulimuli ane faatoa faailoa i le toe 10 minute o le lauga mulimuli poo le final remarks o le a le toe iai ni uarota Samoa, Tonga ma isi gagana o tagata uma o le a o atu i uarota palagi e le toe faatagaina foi seisi lava gagana ua nao le igilisi lava.

O le fono a le AigaSamoa i LoganCity i le aso Sa na tea nei 22 Setema 2013, ua fautuaina ai e Taitai ia sui uma ma aiga e 23 o le AigaSamoa LoganCity, ia aua nei toe tali atu seisi i tusitusiga sese ma le le malamalama i nisi o sui o le Ekalesia leia e faaseseina ai tuagata i luga o le Face book ma nisi o News Paper, pau le tulaga e taatia pea latou e o e lagolago palagi ae finau pea ia manuia le mau lea ua tusa nei ma le 6 tausaga o tapuai le AigaSamoa LoganCity i nofoaga faitele o le finauina o le gagana Samoa. O le aumalaga sa malaga i Samoa o le susuga i le alii Peresiteine Mataafa Tareta Siakisini ma lona faletua ia Anne, afioga ia Leota Savelio Tavai ma le faletua ia Toa, Utai Lokeni Utai ma le faletua ia Lolua, Talaoloa Ah Kan faapea le tamaitai ia Sisi Polelei, na malaga faatasi ai foi ma le tamaitai Loia mai Niu Sila Leuluaialii Olinda Woodroffe mo le lagolagoina o le mau a le AigaSamoa LoganCity i Brisbane.

Share